Qadının məsciddəki ibadəti

[Humeyra]

Qadının məsciddəki ibadəti.

İslam camaat namazlarını məsciddə qılmağı tövsiyə etsə də, qeyd etmək lazımdır ki, bu tövsiyə əksər hallarda
kişilərə aid edilir. Lakin qadının İslam elminə yiyələnmək üçün məscidə getməyində heç bir qəbahət yoxdur.
Peyğəmbər (s.ə.s.) qadınların məscidə gəlmək istəklərinə maneçilik törətməməyi nəsihət etmişdir:

“Allahın qadın bəndələrinə məscidə gəlməyi qadağan etməyin. Əgər sizlərdən birinizin xanımı sizdən məscidə getməyə icazə istəsə, ona mane olmayın”. (əl-Buxari, Müslim).

“Qadınlarınız məscidə getmək istədikdə, onları saxlamayın, lakin bununla belə, onlar üçün evlərində namaz qılmaq daha xeyirlidir.” (Əbu Davud)

Əgər məscidə getmək istəyimizi reallaşdırmaq istəyiriksə, aşağıdakı qaydalara riayət etməliyik:
1. Kişilərlə “qaynayıb-qarışmaqdan” çəkinməliyik, yəni onlarla yaxın münasibətlərdə olmamalıyıq;
2. Geyimimiz aşağıdakı qaydalara müvafiq olmalıdır:
- Əl və üz istisna olmaqla, bütün bədən üzvlərini örtmək gərəkdir;
- Geyim şəffaf olmamalıdır;
- Geyim dar olub, bədənə yapışmamalıdır;
- Geyim kişi geyimi olmamalıdır, kişi geyiminə bənzəməmlidir;
- Geyimə ətir sürtmək, aromatik qoxulardan, kosmetikadan istifadə etmək olmaz;
- Geyim ekstravaqant, diqqət cəlb edən olmamalıdır.
Məscidə getməkdə məqsəd özünü, geyimini başqalarına göstərmək deyil, Allahın rizasını qazanmaq üçün ibadət etmək olmalıdır. Unutmayaq ki, əbu Hureyrədən (r.a.) rəvayət olunduğuna görə Peyğəmbər (s.ə.s.) deyib:

“ Allah sizin var-dovlətinizə və xarici görünüşünüzə deyil, əməllərinizə və qəlblərinizə fikir verir.”(Müslim)

Həmçinin Qurani Kərimdə Uca Allah bildirir:

“Ey Adəm oğulları! Sizə ayıb yerlərinizi örtəcək bir geyim və bir də bəzəkli libas (və ya mal-dövlət) nazil etdik. Lakin təqva libası daha yaxşıdır (xeyirlidir).”(Əraf, 26)

3. Məsciddə aşağıdakıları etmək qadağan edilir:
- Qeybət etmək, boş, mənasız söhbətlər etmək;
Unutmayın ki, Uca Allah buyurub:

“(Ya Peyğəmbər!) İtaət etmə (yalan yerə) hər and içənə, alçağa; Qeybət edənə, söz gəzdirənə” (Qələm, 10-11)

Huzeyfədən (r.a.) rəvayət olunduğuna görə Allah Rəsulu deyib:

”Qeybət edən Cənnətə girməyəcək.”
(əl-Buxari, Muslim)

- Qeybətə və boş, mənasız söhbətlərə qulaq asmaq.
Uca Allah buyurur:

”Həqiqətən, möminlər nicat tapmışlar! (Cənnətə nail olmaqla mətləblərinə çatıb əbədi səadətə qovuşmuşlar!)
O kəslər ki, namazlarında (hər şeyi unudaraq ruhən və cismən yalnız Allaha) müti olub (Ona) boyun əyərlər! (Allahın qarşısında kiçilərlər!)
O kəslər ki, lağlağıdan (lüzumsuz şeylərdən, qadağan olunmuş əməllərdən) üz döndərərlər;“
(Muminun, 1-3)

- Həmçinin mübahisə etmək, səsini qaldırmaq, itmiş əşyanı axtaramaq, satmaq, almaq, kirayəyə götürmək və buna bənzər işlərlə məşğul olmaq;
Əbu Hureyrədən(r.a.) rəvayət olunduğuna görə Peyğəmbər(s.ə.s) belə deyib:

“Əgər kiminsə məsciddə nəsə axtardığını görsəniz, “Allah sənə həmin şeyi qaytarsın” deyin, belə ki, həqiqətən də məscidlər bu məqsədlə tikilməmişdir.”(Muslim).

- Namaz qılan insanın qarşısından keçmək;
Əbul Cüheymə bin əl-Haris bin al-Ənsaridən(r.a.) rəvayət olunduğuna görə Allah elçisi (s.ə.s) deyib:

”Əgər namaz qılan insanın qarşısından keçən bilsəydi ki, öz üzərinə necə böyük günah götürür, yerində 40 (Rəvayətçi 40 gün, 40 ay yaxud 40 həftə deyildiyini xatırlamır.) dayanmağı, namaz qılan müsəlmanın qarşından keçməkdən üstün tutardı”.( əl-Buxari, Muslim).

Odur ki, əziz bacılar, gəlin, əsl müsəlman olmağa çalısaq, istər dilimizi boş, mənasız söhbətlərdən qorumaqla, istər bir-birimizə qarşı daha diqqətli, daha təvazökar, daha sadə və səmimi olmaqla, əsl müsəlman qadına yaraşan şəkildə İslamı yaşayaq. Çünki həqiqətən bu xüsusiyyətlər xeyirli insanların xüsusiyyətidir.
Gəlin, hər birimiz qeybət etməzdən, Sünnəyə müxalif davranmazdan əvvəl bircə dəqiqə dayanaq və düşünək. Düşünək ki, bütün bu əməllərlə biz həm yeni-yeni İslama gələn bacılarımızı özümüzdən uzaqlaşdırırıq, həm də nəinki öz imanımızın, hətta başqa bacılarımızın da imanının zəifləməsinə səbəb oluruq.
Belə ağır yükü öz çiyinlərinə götürməyə hazırsanmı, bacım?!

[Abu_Bakr20]

Əssalamu alekum va rahmatullah va barakatuh

Yuxarıdalara əlavə olaraq aşağıdakı fətvanı da daxil etmək istərdim

Qadın üçün hansı namaz daha xeyirlidir, evində qıldığı namaz, yoxsa Məscid ül-Həramda?

Şeyx Üseymin qısa cavab verərək demişdir ki, qadın üçün evində qıldığı namaz daha xeyirlidir.
Rəsulullah (s.ə.s) demişdir: "Qadınlarınızın məscidə getməsinə mane olmayın, lakin onlar üçün evləri daha xeyirlidir"
Məscid sözü Məscid ül-Həram, əl-Məscid ən-Nəbəvi və Məscid ül-Əqsa da daxil olmaqla bütün məscidləri əhatə edir. Ona görə də yuxarıdakı hədisə əsasən qadının evində qıldığı namaz onun üçün daha xeyirlidir.

Sual Ramazan ayının 27-ci günündə, yanvarın 4-ü, 2000-ci ildə (hicri 1420) Məscid ül-Həramda fəcr namazından sonra verilmişdir.

[Afriya]

Salam aleykum!

Allah razi olsun.